Dr Schorsch vrzählt vom 10. März 2018

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Jâ liabe Leut‘, s’isch eigentlich jedes Jâhr s’gleiche Theater: So om dr Internationale Fraua tag rom drehet dia Gleichstellongsbeauftragte regelrecht durch. S’wird des Elend von de benâchteiligte Fraua lautstark beklagt (manchmâl sicherlich au z’recht), aber sie schiaßet au ganz schee übr’s Ziel naus. Dâ hât doch en dera Woch‘ tatsächlich so a Kampfemanze vorgschlaga, mr sott dr Text von onserer Nationalhymne „genderneutral“ – wenn dr Schorsch des Wort hört, nâ kriagt’r scho rechte Schwoißausbrüch‘ – omdichta: Aus „Einigkeit und Recht und Freiheit, für das deutsche Vaterland!“ sott nâch dr Moinong von Kristin Rose-Möhring vom Bundesfamilienministerium nämlich „…für das deutsche Heimatland?“ werde. Ond statt „Brüderlich mit Herz und Hand“ will se „couragiert mit Herz und Hand?“. Gott sei Dank henn viele Politiker scho gsagt, sia dätet koin Âlass zur Änderung seha. Dr August Heinrich Hoffmann von Fallersleben muss sich jetzt zom Glück net wia a Propeller em Grab romdreha. Bloss wenn mr schon „genderneutral“ sei wellet, nâ muass mr sich au überlege, wia mr künftig onser MUTTERsprâch benennet, weil Gleichberechtigung gâht jâ emmer en boide Richtonga.

A guate Woch‘ ond em Herrgott (ond net Fraugott oder Damegott) sein Sega.