Au für ons Schwâbe brengt des Gsichtsbüchle (Facebook) doch au no so manche scheene Moment. So hend sich jetzt a paar Paradeschwâbe ausgiebig mit schwäbische Metapharn ausanandrgsetzt. Etliche hend’s oifach vrdient, dia sott mr doch emmr wiedr vrwenda: „Der schafft wia an Bronnabutzer“, „Der sauft wia an Birschtabender“, „Dui sauft wia a Loch“, „Der schtenkt wia an Iltis“ odr „Dâ kennsch grad uff dr Sau nausreida“. Grad mundartliche Glanzlichtr send: „A Augamoß wia a Brommhommel“, „Schprenga wia Bettelma uf d‘Kirbe“, „Oms nomgucka kâsch nemme romgucka“, „Schönheit vergâht, aber wiascht bleibt wiascht“, „Wia mr isst so schafft mr, schnell ond schlappig“ odr „Laufa wia Bott“, wobei mit „Bott“ dr Amtsbote gmoint isch.

Grad zua poedisch send mir Schwâbe wenn’s oms leibliche Wohl gâht: „Des schmeckt besser wia a Gosch vol Glufa“, „Wenn bloß mei Buckel au ä Ranzä wer, no kennt i me essä“ odr „Der onöttige Portionafressr“.

Bevor ihr ab jetzt aussehat „wia’s Kätzle am Bauch“, weil i bei Euch neidruck „wia’sHochwasser odr d‘kalte Luft“ ond ihr nâ „romliegat, wia Jüngr am Ölberg“ odr „rot werdet wia a Preschtleng“ wünsch i Euch

a guate Woch’ ond em Herrgott sein Sega