Dr Schorsch vrzählt vom 12. Dezember 2015

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Dr Advent isch dia Zeid dr Besinnung, wo mr sich uff’s kommende Weinachta freut ond mr eigentlich âbends am Adventskranz Weihnachtsliedr sengt. „Stimmet ab mit tausend Zungen, wie die Alten so die Jungen, Lob- und Preis- und Freudenlieder, unserem Heiland Jesus Christ“, so hoißt dr dritte Vers von dem Christ-Metten-Lied aus em 15. Jâhrhondert. Oschtrittig isch – odr vielleicht gilt des au scho nemme – dia chrischtlich Traditio, als des Fundamend für onser gsellschaftlichs Zammaleba. Tag an Ostra, Pfengsta ond Weihnachta, wo mr net schaffa muas, dia basierat eba uff dera Traditio. Ond des Senga von Weihnachtsliedr hât bislang drzua ghört. In dr Familie, em Kendergarta ond (wenigschtens) en dr Grondschul hend se en guatr âbendländischr Traditio Schtrohschtern baschtelt, zsamma Guatsle bacha, Gschichtle verzählt – ond eba Weihnachtsliedr gsonga. Weil des in de Familia meischt nemme so pflegt wird, hend mir zom Glück jâ onsere Kaufhäusr, dia jetzt die Uffgab übrnehmat, Bewahrer ond Vermittler von de Weihnachtsliedr zom sei, in dem se ons beim vorfeschtlicha Einkaufswahn mit „Jingle Bells“ oder „Rudolph, the red-nosed reindeer“ berauschat. So kennat mir beruhigt „O du fröhlich, o du selige, gnadenbringende Weihnachtszeit. Himmlische Heere jauchzend Dir Ehre, freue Dich, o Christenheit“ übr Bord schmeißa. Idealerweis’ übrlasset mir en Zukonft de Engel des Senga von weihnachtliche Weisa, denn „Still, still, still, weil’s Kindlein schlafen will. Die Englein tun schön jubilieren, bei dem Kripplein musizieren. Still, still, still, weil’s Kindlein schlafen will“, hoißt’s jâ in dem bekannta Weihnachtslied.

I wünsch Euch a guate Zeit ond em Herrgott sein Sega