Naderlich freuat sich dia Müttr morga übr a Blomaschträußle. Abr send mr doch amol ehrlich, wer braucht scho dr Muttrtag? Dia Mütter uff koin Fall. Weil, wenn mr tatsächlich als erwachsens Kend an Tag braucht om an sei Muttr zom denka, ja nâ lauft em Leba ebbes ganz gehörig falsch. Für dr Schorsch isch jeden Tag Muttrtag, weil er denkt jeden Tag an se – amol meh’ ond natürlich au amol wenigr, ond er hât au gelegentlich wenigr Zeit für se, wia se eigentlich vrdient. Also wenn dr morgige ausgrufene Ehratag bei viele drzua führt, dass se ab sofort so oft wia möglich an ihr Muttr denket, nâ macht der Muttrtag künftig an Senn. Nâ macht’s au tatsächlich nix aus, wenn mr am Sonntig möglicherweis’ die Blömle vrgessa dät. Abr des passiert jâ jetzt net, weil’r dr Schorsch glesa henn.

A guate Woch’ ond em Herrgott sein Sega