Uff richtige Holzköpf isch die Muettersproch-Gsellschaft, Verein für alemannische Sprache aus Freiburg, beim SWR gschoßa. Meh‘ wia 12 000 Stimma hât der rührige Veroi mit ra Online-Petition gsammelt ond dia denne Rondfunk-Heinis übrgeba, drmit em Radio meh‘ im alemannischa Dialekt gsendet wird. Ond was isch passiert? Nex. Dia SWR-Verantwortliche hen den gerechtfertigta Wunsch oifach niedrgschmettert.

Am Schorsch treibt des net bloß s‘Wasser en d‘Auga, sondern au dr Zorn ens Gsicht. Vor etlichr Zeit hât‘r dene Radio-Heinis scho amâl ens Schtammbuch gschrieba, sie sollet sich a Beischpiel am Bayrische Rondfunk nemma, dâ wird zeigt, was für tolle Sendonga mr em Dialekt macha kâ. Ganz em Gegatoil zum SWR, wo Mundart emmer no zotige Witz ond Schenkelbatsch-Humor bedeutet.

Deshalb liebe Freind von dr schwäbischa Mundart, wenn Ihr Euern Dialekt so richtig gmütlich pflega wellet, nâ kommet‘r am Freitag, 27. Januar, om 19.30 Uhr ens Café-Bricklebrit, dem schwäbischa Märchen- ond Geschichtahaus, dort findet nämlich en Walheim der erschte Mundart-Stammtisch statt. Ond des Motto von dem Zsammahocka, des wird euch sicherlich gefalla: Es gâht om alte Märchen, ond was ihr drmit für Erinneronga vrbendet. Also bringet eure alte Märchenbüchr mit – ond vrzählet.

A guate Woch‘ ond em Herrgott sein Sega.