Meine Güte, dia Zeit dr Friedfertigkeit isch vorbei. Anders isch es net zom erklära, worom grad jetzt emmer meh’ den „kloine Waffaschei’“ beâtraget. Anscheinend rüschtet d’Leut’ uff, weil anders isch des net zom erklära, wia’s alloi em Januar 50 Âträg für den Schei en Schtuttgart gibt. Em ganza vrgangena Jâhr 2015 hât’s en dr Landeshauptschtadt grad amol 221 Âträg drfür geba. Natürlich därf mr mit dem „kloina Waffaschei“ koine scharfe Pischtola odr Gwehr hann, dui Bescheinigong erlaubt bloß des vrdeckte Mitführa von Schreckschuss-, Reizschtoff- und Signalwaffa en dr Öffentlichkeit. Mr kâ eigentlich jetzt fascht scho druff warta, bis dr erschte, wo nach em Weg frâgt ond ogschicktr Weis’ net grad aussieht wia von dâ, Träna vrheult’, mit mr platzta Trommelfell odr vrblitzte Auga vom oine von dene „Kloine-Waffaschei-Djangos“ niedrgstreckt wird. Drbei zeiget dia Erfahronga von dr Polizei: oft däte grad solche Selbschtvrteidungswaffa gega dehn eingsetzt werda, wo sich schütza hât wölle, ond außerdem dät dâdrmit des Ganze oft no eskaliera. Beim ma Konflikt sei’s Beschte, mr dät laut om Hilfe brülla, sagt d’Polzei.

Aus dem Ratschlag von dr Polizei ergibt sich ganz klar, mir Schwâbe send dâmit ganz eindeutig em Vorteil. Weil kaum jemand anders kâ so ovrschämt ond laut flucha wia mir Schwâbe. Ond wer des no net kâ, dr sott an Fluach-Kurs bei dr Volkshochschul bsucha, odr Selbschtvrteidung trainiera odr halt an Teppichbatschr odr an Farraschwanz mit sich führa.

I wünsch’ Euch a friedfertige Woch’ ond em Herrgott sein Sega