Dr Schorsch vrzählt vom 18. Februar 2017

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Des isch nâ doch a bissle viel, ond macht dr Schorsch fascht vrlega. Am letzschta Samstich hât sich dr Schorsch jâ übr die am vrgangene Sonntich âgschtandene Bundespräsidentawahl ausglasse, ond drbei bedaurt, weil’s koin schwäbischa Kandidate geba hât. Des hât dr BZ-Leser „Schmimi“ aus Sachsenheim drzua bewoga, a Briefle an dr Schorsch zum schreiba:

„Liabr Schorsch, so oifach mid dene Bundesbräsidenda isch des, glaub i, edda. Denn bloss weil oinr en Schdugard gebora isch, isch des no lang koi Schwob. A Aff, der en der Wilhelma gebora isch, bleibt an Aff. Ond bloss weil oiner beim Tanka an dr Raschdschdädde Schwendlfengr Wald amaol fenf Minuda lengr brauchd hod wird er au ned glei zom Schwob. Also uff guad Schwäbisch: Mir hend bloss oin schwäbisch Bundesräsidenda ghet ond des war dr Babba Heiss. S duad also Nod, wiedr amol an schwäbischa Bundesbräsidenda zom han. Abr do glei dr Landesbabba Gredsche wegzomloba isch au ed guad, denn do däd jo „ein Unschwabe“ folga. Also mei Vorschlag wär, hier en Urschwob vorzomschlaga, der au no adlig wär, nämlich dr Georg von Erligheim, also dr Schorsch!“

Also freua duat sich dr Schorsch jâ scho drüber, abr er muss den Vorschlag doch ablehna. Erschtens fehlt ihm des notwendige Gwand, er hât außrdem koine Schlips em Schrank – ond er müsst jâ dann ganz diplomatisch dâher schwätza. Ond des fällt im nadierlich onsennig schwer.

Mit ma Augazwinkra a guate Woch’, ond – ernschthaft – am Herrgott sein Sega.