Es duat ja oim net grad schada, wenn mr gelegentlich sein Denkmuskel a bissle trainiert. Ond weil mr jâ a moderner Mensch isch, plâgt mr sich net mit de große, alte Denkr rom, noi mr beschäftigt sich mit oim von de bekannteschte Wissaschaftler, wo’s heut’ gibt: Dem Engländr Stephen William Hawking. Der isch so gscheit, mr hât den – mr ka sage em wörtliche Senn – uff den Lucasischen Lehrstuhl für Mathematik an dr Universität Cambridge nâghockt, uff dem schon seligsmâl Isaac Newton gsessa isch. Ihr wisset sicherlich, dr Newton isch der mit seinr Streuobschtwiese gwä, uff dem sein Grend der Äpfl gehagelt isch ond der dâbei di Schwerkraft entdeckt hât.

Abr zrück zum Stephen Hawking, wo so a Käpsele isch, der dät leicht als Schwâb’ durchganga. Der Kerle hât also ondr anderem des Buch „Das Universum in der Nussschale“ gschrieba ond dâdren beschreibt’r „populärwissenschaftlich“, des hoißt en seim Vrständnis mit oifache Wort’, d’Welt. Des hoißt, dâ drenn werdet dia aktuelle Theoria erklärt, wia Wissenschaftlr des Universum beschreibat. Seit 2001 gibt’s des Buch ond solang hât dr Schorsch des au drhoim. Meh’ als a Dutzend Âläuf hat’r entzwischen ondernomma, em beschta Fall isch’r bis zur Seite 32 komma, bis’r gmerkt hât, er hât dia Seite ois bis 31 wiedr amol net vrstanda. Au di ausdrückliche Empfehlong vom Autor, mr dürft’ au gern’ en de Kapitl mittladren âfanga, hât nex gnützt. Em Gegatoil, des Net-Verschtanda war noch viel größr. Obwohl der Wissaschaftsschmökr au wondrbare Schaubildle drenn hât ond net ganz billig gwä isch, werd’ i den jetzt vrschenka. Ondr dr Voraussetzong, der neue Besitzr erklärt mr, was dâ drenn stâht – des pressiert abr net. Ond wenn nermerds des Buch will, nâ vrbrenn i’s, weil i will mr net emmer wiedr selbscht beweise, i han halt bloß a gsonde Halbbildong.

Ich wünsch’ Euch a guate Woch’ ond em Herrgott sein Sega