Oh moderne Zeita! Emmr meh‘ ganget dia gschriebene Sätz‘ dr Bach na. Mir lebet en moderne Zeite mit Smartphone ond Tablet. Ond hât mr no bis vor Kurzem seine Frâge odr Nâchrichte in dia Apperätla neitippt, so macht mr des jetzt so, dass mr neischwätzt. Egal ob mr nâch r‘Route sucht, ebbes wissa will odr sich elektrisch mit ma Freind onderhalte will. Google, Whatsapp, Facebook, Siri odr Alexa, mir schreibt nemme, mr schwätzt. Doch jetzt kommt‘s. Dia elektrische Kästla vrstandet bloss dia Schriftsprâch. Mit onserer wonderbare Mundart, dâ dehn sia sich durchaus schwer. Doch mir Schwabe send ja bekannt für onsere Käpsela. Also hier jetzt dr Uffruf an älle Programmierer mit schwäbische Wurzla: Brengat doch dene Apparätle endlich Schwäbisch bei.

A gute Woch’ ond em Herrgott sein Sega.