Mir send ons jâ seit langem einig, di Welt isch aus de Fuga. Drbei gâht’s em Schorsch dessmâl net om di groß’ Weltpolitik. Noi, au bei ons em Land wisset manche nemme, was recht isch ond wia se für ons no weitr des selbschtbeschtimmte Entscheide abnehma wellet. S’gibt also en Kassel am 23. April wiedr amâl a Fescht zom „Tag der Erde“. Ond was machet dia Vrânstalter? Dia ladet alle langjährige Ständlesbetreibr aus, di eigentlich uff em Grill Brâtwurscht ond andere fleischliche Genüsse kredenza wella henn. Weil des sei net nâchhaltig, so di Begründong ond deshalb will mr „ausschließlich vegetarische und vegane Speisen“ âbiate, hoißt’s em ma Brief von dene Grasdackl. Dr Schorsch könnt’ jetzt dr Professor Mike Archer von dr University of New South Wales (UNSW) en Australien zitiera, dr Kerle sagt nämlich: Pro Kilogramm nutzbare Proteine aus Getreide werdet „unter Umständen 25 mal mehr fühlende Wesen getötet als durch nachhaltige Fleischproduktion“.

Abr em Schorsch gâht’s jetzt gar net om Rechthaberei, er will oifach als denkendr Mensch selbr entscheida ond braucht nemand, wo für ihn s’Denke abnemmt. Ond deshalb gâht dr Schorsch heut’ Âbend au en di Kleinkunschtbühn’ en Walheim, weil dâ vrzählt dr schwäbische Mundartautor Wilfried Albeck vom „Saitenwurscht-Aquator“ – ond dr Schorsch wird drzua a Pärle Saitenwürscht mit Kartoffelsalat essa. Ond nâch Kassel zieht’s ihn sowieso net.

A scheene Fasnet, a guate Woch’ ond em Herrgott sein Sega