Ja, was isch den des? Vielleicht hât entzwischa dr Schorsch di senil’ Bettflucht packt, uff jeden Fall isch’r am Mittwoch am früha Morga uff seim Balkon ghockt, ond was hât’ gehört? Dia erschte Vögela hend zwitscherd wia narret. Fascht scho a bissle wia Frühleng isch des gwä. Richtig schee. Was dia Vögela jetzt bloss machet, wenn’s wiedr Sauwetter wird – mr woiß net. Bleibt zom hoffa, dass des Sprichwort net schtemmt, wonâch dia Vögel, wo am Morga früh sengat, am Âbend di Katz’ holt.

A guate Woch’ ond em Herrgott sein Sega.