Dr Schorsch vrzählt vom 28. November 2015

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Ja, is den heut’ scho’ Weihnachten, hât di ehemalig Lichtgschtalt em deutsche Fußball, uff di jetzt a richtigr donklr Schatta gfalla isch, vor a paar Jährle gfrâgt. Noi, no net ganz, abr am Denschtich fangt dr Dezembr a. Des isch bekanntlich dr zwölfte Monat em Jahr ond deshalb sott mr sich mâl mit der Zahl „Zwölf“ ausanandr setza. Weil di isch scho ebbes Bsonders, di gibt’s en älle Kultura, mir lebat eigentlich em ma Zwölfer-Rythmus. So geltat zwölf Mal fenf Herzschläg en dr Minut’ als optimale Frequenz, zwoi Mal zwölf Stond machet onsern Tag aus, onsere klois Planetle kreist ennerhalb von zwölf Monat oimal om d’Sonn’, ond zwölf Tierkreiszeicha zierat s’Firmament. Wia mir ons bewegat, wird von zwölf Gehirnnerva gschteuert, onser Herzle schlägt vor zwölf Bruschtwirbl, onsr Darm fangt mit am Zwölffengrdarm a, zwölf von 20 Amminosäura kâ onsr Körper selber herschtella, onsr Skelett macht zwölf Prozent vom Körpergwicht aus – außer bei dene von ons, wo „bsonders schwere Knocha“ hen, wia se gern dr hohe Ausschlag uff dr Waag’ begründat. Zwölf Mittlfuaßknocha helfet ons beim Laufa, ond s’Bescht: Mir regenerierat onsre Körperzella ennerhalb von zwölf Monat, danâch send mir wia neu.

Glotzed mr a bissle übr onsr Tellrrand naus: em Buddhismus hât dr Rat vom Dalai Lama zwölf Mitgliedr; d’Japânr, d’Inder, d’Bengala, d’Griecha, d’Römr oder d’Hethitr henn älle zwölf Hauptgöttr. Dr König Arthurs hât an seinr Tafelrond zwölf Rittr vrsammelt ghet ond des „Zwölftafelgsetz“ isch di ältescht römisch Rechtsufffassong. Dia Kaaba, des Heiligtum vom Islam, isch a kubischr Schtoi mit zwölf Kanat, des hemmlische Jerusalem hât zwölf Tor’ aus Perla ond zwölf Grondschtoi mit de Nâma von de zwölf Aposchtl ghet.

Ond dâ send mr jetzt bei de zwölf Jöngr vom Jesus âkomma ond au en dr Adventszeit, di jetzt âgfanga hât, ond in dere mir ons uff di Geburt von dem Chrischtkendle freiat.

I wünsch’ Euch a guate Woch’ ond em Herrgott sein Sega