Tage, wie diese“ (frei nâch dera Punkband „Die toten Hosen“) brauchet mir wirklich net. Eigentlich dät’s scho lange, was der granate Grasdackl, wo grad s’Kaschperle em Weiße Haus macht, en seinr ohsäglicha Eifall macht. Weil, es kâ jâ wirklich net sei, dass mr heutzutag völlig den Fortbeschtand von onsrer oinzoga Welt oifach ignoriert, net aus dr Not, sondern oifach aus völligr Ignoranz. Noi, dr Schorsch mit em Neckarschtadio (heut’ au gern als Mercedes-Benz-Arena bezeichnet, wobei sich dr Gottlieb Daimler ganz beschtimmt em Grab romdreht) beschäftigta. Es gâht om die sich selber gern übrschätzende, selbscht ernannte „Tierschützr“ von Peta. Dia henn doch wirklich nex anders zom doa, als zom übrprüfa, wia vegan die Vrpflegung em Neckarschtadio isch. Bloß „Langos Natur“ ond „Pommes Frites“ däts für vegane Fußballfans geba, ond außerdem seiet dia Maultascha bloß vegetarisch ond net vegan.

Ja, liab’s Herrgöttle von Biberach, wo send mr denn jetzt âkomma. Wenn intressiert denn so an Hennadreck? Wenn mr zom Fußball gâht, nâ frisst mr gefälligscht a Stadio-Wurscht.

A guate Woch’ ond em Herrgott sein Sega