Dr Schorsch vrzählt vom 5. Dezember 2015

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Jetzt em Advent isch di Zeit komma, sich übr di wirklich wichtige Sache Gedanke zom mache. Noi, i moin net di Frâg’ was die Geburt von dem Chrischtkendle vor meh’ als 2000 Jâhr in dr heutiga Zeit mit Terror ond Flucht von Milliona von Menscha weltweit für ons bedeutet. I moin, di alles entscheidende Frâg für Weihnachta: Truthahn odr Gâs? Odr vielleicht doch a gfüllte Kalbsbruscht odr an Saurabrâte? Ois isch en dr Familie vom Schorsch oschtrittig, ebbes Vegetarisch’s kommt net en d’Kachel. Ond drmit’r bei etwaige Diskussiona mit Radikal-Veganer au schnell dia richtige Argument bei dr Hand hât, hât sich dr Schorsch des Buch „Tiere essen dürfen – Ethik für Fleischfresser“ von Florian Asche besorgt ond au scho a weng dren gschmöckert. Scho uff de erschte Seita wird oim drbei klar, worom es Vegetarier und Veganer gibt: En de vrgangene 50 Jâhr hat’s tiefgreifende Konflikt zwischa de Jonge ond ihre Eltra geba. In den 60er-Jâhr isch’s om die bürgrlich Betulichkeit gânge ond mr hât „Ho-Ho-Ho Chi Min“ gschria ond en Kommuna mit freir Liebe glebt. En de 70er-Jâhr hât mr „Atomkraft? Nein Danke“ uff sei Enta odr R4 bebt, weitere zehn Jâhr spätr war mr friedensbewegt ond hât gegen Mittlstreckaraketta demonschtriert. Blöderweis’ isch en de 90er-Jahr dr Kommunismus gscheitert. Heut’ machet konservative Regieronga sozialdemokratische Politik ond sozialdemokratische Regironga setzat wirtschaftsliberale Reforma durch. S’gibt koine Feinbildr meh’ wia dr Strauß, dr Kohl, dr Wehner odr etwa d’Margaret Thatcher. Dr jonge Mensch’ muss sich zwangsläufig frâga, gega wen ond für was mr no kämpfe kennt. En ra Gsellschaft von Leut’, wo satt ond gwärmt send, wo mr gsichert und befriedet sei Auskomma fendet, dâ wird di Frâg, wen mr den uff Teufl komm raus beglücka kennt, schwer. Zom Glück gibt’s d’Viechr. Dia ausbeutete, gschondene Kreature sind jetzt die „Sklaven des 21. Jahrhunderts“ ond dia Vrfolgte dr demokratischa Welt. Also rettet mr dia, wenigschtens uff em Tellr. I woiß jetzt zwar emmer no net, was es an Weihnachta zom Essa gibt, i wünsch Euch abr trotzdem a guate Woch’ ond em Herrgott sein Sega