Gelegentlich sott mr a Busfahrt ondernehma. Noi, net a Ausflugsreis’ zu irgend oim touristischa Ziel, sondern mit ma Liniabus. Des isch durchaus onderhaltsam ond brengt neuartige Eiblick’ ens menschliche Zusammaleba. Idealerweis’ wählt mr a Fahrt en de Âbendschtond, wenn’s draußa scho recht donkl isch, nâ sorget dia schnelle Fahrta durch d’Kurve, des abrupte Bremsa ond des immense Beschleunige für überraschende Erlebnis’. Bsonders abwechslongsreich isch’s, wenn mehr vrkampft an so ma Feschthalt-Schtängle wenig elegant probiert, des Gleichgwicht zom halta ond dene Bewegonga des Landschtraßa-Dampfer entgega zom wirka. Allerdings schaffet des bloss en lange Jâhr’ geschtählte Monats- oder Jahreskarta-Fahrer. Dr Gelegenheits-Busreisende isch heillos übrfordert. Hât mr nâ endlich an Sitzplatz neba ma mürrisch vor sich nâdösenda Nebasitzr ergattert, erkennt mr sofort dia ÖPNV-Profis: Entwedr schwer vrtieft en an dicka Schmöker, alternativ durch di Weita des Internet surfend odr mit oglaublichr Gschwindigkeit wichtige E-Mail odr Kurznâchrichta verfassend. Abgschottet vom Hier ond Jetzt mit Ohrschtöpsl odr farbafrohe Kopfhörer genießt der Vielfahrer sei Lieblingsmusik, ond des laut – mr will jâ sein Nebasitzr an seim Musikgschmack au teilhabe lasse.

Au dia Fahrzeit kriegt ganz neue Einheiten. Nâch Fahrplâ’ dauert di Busfahrt vom Kronazentrum en Bietigheim bis nach Erligheim exakt elf Minuta. Mr könnt’ abr au saga, sie dauert 31 Gähnâfäll’ vom Mitfahrer schräg links von mir in der dritta Reiha odr sieba wohltönende SMS-Nâchrichta aus’m hendera Busbereich odr zwoi Duftwolka dr Gschmacksrichtong „Zwiebl-Rettichsalat“, dia oim von henda am Gnick vorbei streichet. Andre Körprausdünschtonga send zwar dâ, lasset sich abr zeitlich net eiordna.

Ich wünsch’ Euch a guate Woch’ ond em Herrgott sein Sega