Dr Schorsch vrzählt vom 8. Juli 2017

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Ach herje, wie froh isch dr Schorsch. Weil er isch koi Politikr ond erscht recht koi Diplomat. Dâ muss sich doch geschtern onser Bundes-Angela mit drei richtige Grasdackl treffe, weil se jâ di Gaschtgebere von dem Gipfel mit de 20 scheinbar wichtigschte Menscha von dr Welt isch. Ond obwohl mendeschtens zwoi von dene drei ons uffs übelschte beleidigt henn, was en diplomatische Kreis’ jâ so richtig vrwerflich isch, muss onser Kanzlere süß-säuerlich lächle ond dene au no vor etliche Kameras dr Bricket schüttla. Des kennt dr Schorsch uff koin Fall. Er dät dâ ganz oifach den 365 Eiträg umfassenda Schimpfwortkalendr vom Thaddäus Troll aus em Schtegreif zitiera.

A guate Woch’ ond em Herrgott sein Sega