Es wird herbschtlich. Mr merkt’s morgens, weil’s kühl ond feucht isch, ond abends, weil’s kühl ond schnellr donkl wird. Ond mr merkt’s, weil se jetzt wiedr dia ohnötigste Frücht dr Welt âbieta. Gelb send se ond mit Noppa ond en de ohmeglichschte Forma ond au riesig groß. Jâ genau, dr Schorsch moint die Kürbis, dia mr frühr bloß de Säu vrfüttrt hât. Koi herbschtliche Dekoratio kommt entzwische meh ohne dia gelbe ond orangische Kerle aus. Dr Schorsch mâg meh Kaschtaniamännla. Abr wia’r jetzt lesa müssa hât, wird’s dia scheints bald nemme geba, weil die uralte Bäum von irgend so ra blöde Krankheit befalle send. Dr Schorsch mâg Kaschtania au deshalb, weil mr aus dene koi Supp’ mache kâ, wia aus des Kürbis.

A guate Woch’ ond em Herrgott sein Sega