Es muas sei: I ben koi enthusiastischr Fan von „Schtar Wars“. Grad amol dia „Episode I“ han i vor etliche Jâhr âglotzt ond erscht en dr letzschte Wocha zwoi andre von dene ensgsamt sechs. Nadürlich kenn au i dr röchelnde Darth Vader ond andre Figura, am liabschta han i den quickenda ond blinkenda Blechoimr R2-D2. Des war’s abr au scho. Bloß jetzt hât mr mi em redaktionella Omfeld doch au a bissle wuschig gmacht, weil’s doch des siebta Filmle gibt. A ganz nettr Kolleg isch sogar am Mittwoch so kurz vor Mittrnacht ens Central-Kino nâch Ludwigsburg pilgert, om pünktlich om 0:01 Uhr am Donnerschtag des „Uffwache von dr Macht“ zom âgucka. A Fan muas macha, was a Fan macha muas. Bloß, ob Journalischta macha müssa, was dr Disney-Konzern – dr wo des ganze Schpektakl vrmarktet – will, dâ kâ mr a ganz eideutige Antwort geba: natürlich net. Am Montag en dera Woch’ hen se mit ma riesiga Brimborium en Los Angeles mit ma Haufa ganz wichtige Leut’ dia Premiere zeigt. Ond, was hât mr drübr erfahre? Nex. Am Dienschtag hen se bei ons dia Journalischta zur Premiere eiglada. Ond, was hât mr drübr erfahre? Wiedr nex. Außer der Nâchricht en de soziale Media, mr dürft’ erscht am Donnerstich nach neun Uhr ebbes drüber schreiba.

Ja liabe Leut’, wo kommet mr den dâ nâ? Was send denn des für Journalischtakollege, wo bei dr Premier’ waret ond sich von dem Disney-Haufa vorschreiba lasset, wann ond was se schreiba dürfa? Des „Uffwache von dr Macht“ stâht also em krassa Gegasatz zur sprichwörtlicha „Macht dr Feder“, mr kennt fascht sage für di „Ohmacht dr Feder“.

Abr wia gsagt, eigentlich isch mir „Star Wars“ fremd – ond egal. Wenn scho fantastische Gschichta, nâ halt i’s mit de Märchen von de Gebrüdr Grimm, zumal’s oinige von dene jetzt sogar en schwäbischr Mundart gibt. Ach, des hätt’ i jetzt fascht vrgesse. Uff dr „Schorsch“ vom letzschta Samstich – dâ isch’s jâ om Weihnachtsliedr ganga – han i vom Gerhard a ganz liabe E-Mail kriagt: „…damit amol widder Glegaheit isch, Weihnachsliadr zom höra ond mitandander zom senga, kommt am Mittwoch, 23. Dezembr, dr Benedikt Obert met seim Chor ,sing4fun’ aus Güglinga extra zo ons nâch Erligheim end Johanneskirch. Des wird sichr a guate Sach.

I wünsch’ Euch a guate Woch’ ond vor ällem a gsegnete Weihnacht