Zwoi Sacha henn en dera Woch’ dr Schorsch so richtig zornig gmacht. Noi, net dr Alex mit seine Schtolperer aus Bad Cannstatt. Dâ henn doch am Mondich dia Grasdackl von dr Weltgsondheitsorganisatio (WHO) so richtig oin nausghaue: wenn mr reglmäßig Wurscht odr Schenka esse dät, nâ dät sich des Risiko von Darmkrebs erhöha. Jesses noi, etliche henn da Zuständ’ kriagt ond sich scho als Gsälzbrotesser gseah ond sich en schaurige Bildr a Zukonft mit Rüba, Hafrkecks ond Tofu-Floisch-Küchla ausgmâhlt. Onsre badische Brüdr ond Schwestra vom Schutzvrband Schwarzwäldr Schinkaherstellr henn uffschria, onsere italienische Schinka- ond Salâmi-Herschteller henn gar vom ma „Floischterrorismus“ gschwätzt. Ond was isch am Freitag bassiert?

Dia Kerle von dr Internationala Krebsforschongsagentur, wo zur WHO ghöret, rudret wiedr zrück. Mr häb’ koin völliga Vrzicht uff Wurscht vorgschlage. Vielmehr häb’ mr sage wölle, wenigr Floisch ond Wurscht dät’s Krebsrisiko vrrengra. Dâ send se nâ au wiedr ganz näh bei onserm Minischterpräsident. Weil der hât jâ gsagt, wenn mr an Sack’ Grombiera uff oimal essa dät, nâ müsst mr auch schterba.

So richtig narret isch dr Schorsch abr am Mittwoch worde, weil dâ hât dr Gmeindrat von Kressbronn bschlossa: Ab dr nächschte Saiso dürfte Kloikender em Strandbad am Bodasee nemme nackig bade. Mr dät des mache, om dia Kendle vor Fotos mit pornografischa Hendrgrond zom schütza. Ja, henn se denne Kressbronner Komunalpolitikr eigentlich s’Hirn klaut ond kennet dia sich nemma dra erennern wia se als kloine Bettsoicher gern onda rom blutt em See pflanscht henn? Richtig bleed isch’s nâ worda, wenn mr na dia Rechtfertigong vom Kressbronner Schultes lesa muss. Er dät sich von dem Âblick von den nackige Kendle gschtört fühle, isch oi Grond für die Entscheidong gwä. Dâdrvo isch’r der Grassdackl nâ an Tag schpäter wiedr abruckt mit dem Argument: Kloine Kendla häbet koine Wendla â, ond deshalb dätet se jâ au en d’Sandkäschte odr uff andre Schpielgerätschafte biesla – ond des sei jâ recht ohygienisch. Ois isch klar, mit meim Enkele gang i jetzt uff koinfall nach Kressbronn zom Urlaub macha. Liabe Leut’, wo send mir nâhkomma? Wia isch bloß aus „Sex, Drugs and Rock’n’Roll“ aus onsrer Jugend „Prüderie, Rooibos-Tee ond Helene Fischr“ worda?

I wünsch’ Euch a guate Woch’ ond em Herrgott sein Sega