No. 148: Dr Schorsch vrzählt vom 31. März 2018

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Send dia Vrsteckla für d’Osternestla scho ausguckt? So wia’s jetzt aussieht, isch s’Wettr wenigstens am Ostermontag so, dass mr em Freia mit dr Uffforderong „Gack, gack – dr Has’ hât glegt“ die Kendle zom Sucha eilade kâ. Jetzt scho zemlich Alluminium-blond erinnert sich dr Schorsch no gern an die Sucherei en seinr Kendheit. Irgendwia hât zu dera Zeit an Ostra jed’s Kend Rollschuah kriagt. Jawohl „Rollschuah“: mit vier Rädle ond mr Schlüssl, drmit mr des Metallgstell verlängera könna hât, wenn dia Schuh em Lauf dr Zeit größr worda send. So Rollschuah hât au dr Schorsch irgendwann zu Ostra kriagt – ond a neue, teure Stoffhos’. Irgendwie a schwierige Kombination, weil en dr Woch’ nâch Ostra hât mr dia Hos’ doch glei zom Kunststopfa brenga müssa.

A guate Woch’ ond em Herrgott sein Sega