Mr kommt ja gar nemme mit. Jetzt hât mr grad so recht ond schlecht dia sommerlich‘ Grillerei hender sich brâcht, ond au dia ohseelig‘ Kürbissuppa-Zeit hât mr übrlebt. Ond jetzt? Jetzt muas mr sich schon wiedr mit Schpekulatius, Dominoschtoi ond Lebkuacha ausanandrsetza. Mr hât des Gfühl, s‘wird emmr früher. Ond des grad en dene Wocha, wo mr sich – Dank vom ma richtiga „Goldena Oktober“ – no em T-Shörtle ond ohne Kittele naus traua kâ. Wenn dr Schorsch em Oktobr uff Schpekulatius, Dominoschtoi ond Lebkuacha guckt, na friert‘s ehn. Mr därf also gspannt sei, ob‘s ab em 2. Januar nâ bereits Schoklad-Oschteroir ond -Oschtrhasa gibt. Jâ koi Zeit vrliera, kennt mr moine. Dr Schorsch wird sich uff jeden Fall bis end Adventszeit Schpekulatius, Dominoschtoi ond Lebkuacha vrweigra.

A guate Woch‘ ond em Herrgott sein Sega.