Nr. 152: Dr Schorsch vrzählt vom 28. April 2018

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Schwäbische Eigaheita, gibt’s dia? Vielleicht a paar wenige. Eventuell onser Leidaschaft für Toigware, em speziella Spätzle, di mir eigentlich universell brauchet. So hât doch dr Schorsch tatsächlich jetzt a paar Owissende aus Westfala drvo übrzeuga müssa, welcher Genuss Linsa mit Spätzla send. Natürlich isch dia Übrzeugongsarbeit vom Schorsch glonga. A bissle schwierigr wird’s beim Spinat mit Spätzla. Abr wer erst âmol di gschmeidig Vrbendong von gaggelesgelbe Spätzla mit dem sâhnige Gmüs’ ond dem Dotter vom ma Ochsaaug genossa hât, der will niameh’ a Grombiera zom Spinat.

A guate Woch’ ond em Herrgott sein Sega