Nr. 160: Dr Schorsch vrzählt vom 23. Juni 2018

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Jesses noi, des war knapp!


Jetzt müsset mr abr älle Registr ziaga, drmit onsre Bundes-Kickr heut’ Âbend dene großgoschige Knäckebrot-Bürschla zeiget, wo dr Bartl dr Moscht hohlt. Klar isch, au dr Schorsch wird onsre Buaba wia narret aus dr Ferne âfeira ond älle vorhandene Dauma drucka. Ond vielleicht sott mr mit ra Zettlwirtschaft au dia ällrletztscht Motiva rauskitzla. Wia wenn’s gestern gwä wär, erinnra mr ons no an dr Spickzettl, den dr Olli Kahn seim Tortwartkolleg Jens Lehmann 2006 vor dem legendäre Elfmeter-Schiaßa beim WM-Viertlfinalsieg gega Argentinien zugsteckt hât. Jetzt braucht onser Nommr ois, Manuel Neuer, sichr koin Spickzettl, weil’s en dr WM-Vorrunde koi Elfmeter-Schiaße gibt. Abr vielleicht dät’s dem oine ondr andra bei dr Nationalhymne am Âfang guat doa, wenn’r dr Text vom Deutschland-Lied ablesa könnt ond so onser Nationalhym’ mitsenga kennt. „Blüh im Glanze dieses Glückes“ dät nâ möglichrweis’ helfa, den oine Schritt meh’ zom mache, drmit des zwoite Vorronda-WM-Spiel net zur Zittrpartie wird.

A guate Woch’ (nâch ma souveräne Sieg von onsere Buaba) ond em Herrgott sein Sega