Nr. 170: Dr Schorsch vrzählt vom 18. August 2018

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Dr Herrgott kâ oin au mit Viel strâfe. Di Woch’ hât dr Schorsch amol an Blick uff die Stroiobstwiesa von seinra Frau gwagt. Ond was soll’r saga, s’hât en fascht dr Schlag troffa. Die alte Äpfel- ond Birnabäum hänget so voll, wia no nia. Ond teilweis hanget dia Äscht bis uff dr Boda na. Oi Baum hât sich wahrscheinlich denkt „was soll’s“, ond oifach zwoi riesige Äscht ennerhalb von sechs Wocha weggschmissa. Eigentlich hât’r recht ghet, denn was soll mr au mit so viel Frücht’ âfanga. So viel Äpflmuas, Äpflkucha, Äpflküchla odr Ofaschlupfr veträgt oifach koi Mage.

A Fässle Moscht wär a Idee. Bloss wer soll den drenka? Mit Graußa erinnert sich dr Schorsch an sei letzschte Mostproduktion. Eigentlich isch des Gsöff ganz guat worda – zwoi Drittel Äpfl, oi Drittel Birna ond a Handvoll Schleha – abr trenka wella hât’n oifach koinr. Ond was isch’s End vom Lied gwä? Irgendwann isch dr Moscht zäh worda ond a Essigmuadr hât sich broit gmacht. Jâhrelang hât’r sein Salat mit Obschtessig âgmacht, abr irgendwann isch nâ au guat gwä.

Jetzt bleibt also bloss no a hochprozentigr Erlös von dem reicha Erneseega. S’werdet also die Äpfl ond Birna zammaraschpla ond en blaue Pastikfässle eischlage ond nâ ghofft, dass dia segensreiche Hefepilz aus dem Zuckr recht viel Alkohol machet. An Brennmoischtr seines Vertrauens hât dr Schorsch jâ. Bleibt zom Hoffe, dass der bei dem viela Obst au Zeit hât, an geistreicha Obstler zom Destilliera.

A guate Woch’ ond em Herrgott sein Sega.