Gott sei Dank, s’isch wiedr a bissle wärmer worda. Des war jâ in de letzschte Tag a krasse Gschicht’, quasi von de kurze Hosa ond em leichta T-Shirtle direkt en dicke Wollsocka, Strickjack’ ond en dr warme Teppich eigwickelt. Mr hât ja schier gar Angst ghet, mr kennt Âfang Oktobr en de Wengert Eiswei lese. Guate zwoi Tag hât mr’s en dr Wohnstub’ ohne Heizong ausghalte, nâ abr isch rom gwä mit dr Heizölsparerei. S’isch scho arg nötig worda, dass mr statt „sibirische“ 11 Grad wohlige 23 Grad en dr Stub’ hât. Was des abr wiedr koscht. Mr möcht dia Ölscheich uff dr Mond nuff schiaßa, henn doch dia Schlawiner so glamm heimlich den Ölpreis nufftriaba. Am 28. September henn’ses doch tatsächlich gschafft, der Höchstand von vor vier Jahr von 79,40 Euro pro Litr zom übrtreffa. Em letzschta Jâhr war s’Öl ganze 20 Cent billigr.

Dia Wettrfrösch, dia machet bloss wenig Hoffnong. So dät’s durchaus Chanca für an „goldena Oktobr“ geba, en dr zwoite ond dritta Woch’ gäb’s nomâl übrdurchschnittliche Temperatura, gleichzeitig wär abr en dr vierta Oktobrwoch’s durchaus dr erschte Schnee em Südosta möglich. Ond außerdem sott mehr am End’ vom Oktobr scho Wenterreifa uffziaga. Also wird mr wohl d’Heizong âlassa müssa, ond dia Ölscheich noch reichr macha. S’isch a rechts Elend.

A guate Woch’ ond em Herrgott sein Sega.