Es isch a richtig‘s Elend. Ständig wird ons Schwâbe vorgworfa, mir wäret knickig. Natürlich stemmt des net. So gebat mir doch ohheimlich gern, wenn mr au net gfrâgt send, dia allerbeste Râtschläg. Völlig koschtalos. Doch des isch jâ no lang net älles. Mr glaubt‘s kaum, mir send so spendabel beim Länderfinanzausgleich, wenn auch net ganz freiwillig: Rond 2,78 Milliarde Euro hend mir letzschtes Jâhr an die andre Ländr zählt. Ond en dr Fußballbundesliga, jâ da gebet mir gern die Punkt de andere Mannschafta. Mit dem Geiz von de Schwâbe isch‘s also net weit her. Abr vielleicht liegt‘s ja in der Antwort von dem Schwâb, dem mr a Spendados‘ vor Nâs ghalta hat: „Wenn mr gebat, nâ gebat mir gern. Abr mir gebat nix.“

A guate Woch‘ ond em Herrgott sein Sega.