Obwohl, Gott sei Dank, dr ohsägliche Halloween-Âbend rom isch, standet übrall dia Kürbis-Goischtr rom. Ond des isch eigentlich völlig ohschwäbisch, weil mir hend en onser’r Kendheit natürlich Rüba-Goischtr gemacht, was viel schwer’r ond au extrem gfährlich gwä isch. So an Goischtr aus mr Kürbis isch eba koi richtige Herausfordrong, weil dia gelbe Frücht’ send jâ von Haus aus enna scho fascht hohl. A Angerscha odr a Zuckrüb’, dia send massiv ond dia muas mr mühsam mit ma scharfa Tascha- odr Küchamessr aushöhla. Des hât scho für ohzählige blutige Fengr gsorgt. Hât mr dia Angerscha na endlich enne hohl ghet, nâ isch’s fascht scho a filligran’s Gschäft gwä, en die kloi Rüb’ au no a lachends Gsicht, idealrweis’ mit scheene Zäh’, neizomschnitza. Ond lang ghoba henn dia Rüba-Goischtr au net lang, weil es halt schnell ganz ronzlig worde send.

A guate Woch’ ond em Herrgott sein Sega.