S’isch grad echt zom vrzweifla. Des kalte Graußa packt oin, wenn urplötzlich ond völlig oerwarted die saublöd gelb’ Warnleucht’ em Auto-Amaturabrett blinkt: Dr Bezintank isch fascht leer! Die Ölscheich, Ölmultis ond onser Staat hend ons mâl wiedr so richtig am Wickel. 1,54 Euro zocket’se ons pro Liter ab. Mr möcht nâch Österreich auswandra, weil dort koscht dr Sprit rond 20 Cent wenigr wia bei ons. S’hoißt jâ, dr hohe Preis dät am weniga Rega liega, weil die Tankschiffla uff em Rhein bloss zur Hälfte belade werda könnet, weil’s dort eba Niedrigwassr gibt. Ja Herrschaftszeita, für wia bleed haltet dia ons denn? Hat der Schorsch ebbes vrsäumt, ond Österreich hât jetzt a Hafa direkt am Meer? Mr sott mâl wiedr übr an Holzvergasr nâchdenke. Weil nâch dem trockena Sommr henn einiga Bäum uff dr Stroiobschtwiese etliche dicke Äscht abworfa, dia mehr guat zum Autofahra braucha könnt.

A guate Woch’ ond em Herrgott sein Sega.