Wia hât scho der Komikr Hans-Peter Kerkeling gsonga? „Das ganze Leben ist ein Spiel und wir sind nur die Kandidaten.“ Genauso kommt’s oim vor, wenn mr seit dera Woch’ nach England glotz. Oin von de gröschte Spielr hend se jetzt dort zum Premierminischtr gmacht, ond net bloss dia Engländr send jetzt dia Kandidate, mit dene er spielt. Di Ohfähigkeit isch entzwischa en dr ganze Welt zor wichtigsta Oigaschaft für a politisch’s Amt worda. Ond was ufffällig isch, mr muss au no a bsonders bleede Frisur han, na kâsch Staataführer werda. Noi, dr Schorsch schwätzt jetzt wirklich net von onsrer Bundesangela, weil dera ganz wiaschte Zeita (mit Kochhafefrisur) send ja vorbei. Dr Schorsch moint die Kantschädlfrisur vom Nordkoreanischa Despota, er schwätzt vom ohfassbar oifältige Präsident mit dr blonda Haarspray-Föhn-Frisur ond aktuell vom permanent vrstrubelta Mietr von dr Dowing Street Nommr ois. A guate Woch’ ond em Herrgott sein Sega.