Em Altr wird mr emmer meh‘ schludrigr. Anders kâ sich‘s dr Schorsch net erklära, worom’r so manch’s Handwerkszeug nemme fendet. So hât doch jetzt sogar sein gliebta Tintefüllr, ond zwar dehn mit dr scheena Goldfedr, vrschlamper. Des isch zwar ärgerlich, bloss schlemm isch’s net. Jetzt muas’r halt mit ma Kuglschreibe seine Notiza mache. Blöd wird’s wenn a Personaschützr, wie jetzt en dera Woch‘ zom Lesa gwä isch, sei Handwerkszeug vrliert. Dem Kerle fehlt doch tatsächlich sei Pistol – einschließlich Patronamagazin. Es stellt sich jetzt net bloss di Frâg‘ wie’r sei Person aus em Umkreis vom Bundespräsidenta ohne Pistol schütza will. Vielleicht mit ma Taschamessr? Viel schlemmr isch doch, wer hât jetzt des gfährliche Handwerkszeug ond war stellt’r drmit â?

A guate Woch‘ on dem Herrgott sein Sega.