Mir strengat ons scho saumäßig â mit dr Gleichmachrei, hauptsächlich, wenn’s om’s Sprâchliche gâht. Jedr/jede/jedes soll s’gleiche Recht han, dr oine hängt an die männlich Bezeichnung a „/innen“ nâ, andre vrohstaltet unser Sprâch mit dem ohseeliga „Gender*“. Mit „Fahrende“ statt „Fahrer“, „Trinkende“ statt „Tricker“ oder „Mitessende“ statt „Mitesser“ kâ dr Schorsch scho glei gar nix âfânga. Selbscht uff am Lokus will mr’s jetzt jedem recht mache, Männle, Mädle ond Woisnetwas sollet eigführt werda.

Wenn’s abr nâ wirklich om Gleichheit gâht, nâ vrsaget mr allerdings uff ganzr Linie. Dass es emmerno em Zügle odr em Fliegr a erschte ond zwoite Klass’ gibt, dâmit kâ dr Schorsch grad no omganga. Wenn m’r abr an onsr Gxondheitssystem denkat, mit privatvrsicherte ond Krankakassa-Patiente, nâ haut’s em Schorsch tatsächlich dr Vogl naus. Des wäre doch mâl a Uffgab’, bei dr sich’s lohna dät, ebbes zom ändra.

A guate Woch’ ond em Herrgott sein Sega.