Nr. 230: Dr Schorsch vrzählt vom 19. Oktober 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Was für a Theatr machet denn onser Europakamerade von dr Insel. Nei en d’Kartoffla, raus aus de Grombiera, nei en d’Erdäpfel ond wiedr naus. Odr vielleicht doch net. Jetzt send doch wiedr âmol stondalang zsammaghockt ond an dem Austrittsverträgle rombastelt. Sogar dr stubbelige Engländr scheint jetzt zfrieda, bleibt jâ au nex anders übrig. Dia europäische Grande hend a bissle zrknirscht doa, abr sich doch au bissle gfreut. Was passiert jetzt? Dr Schorsch vrspricht Euch, am heutiga Samstich haut des britische Onrhaus des Verträgle dem Johnsen links ond rechts an Goscha nâ. S’wird wiedr a Vrlängong geba, ond nâ wird nomâl verhandelt. S’isch doch entzwischa so, s’woiß eigentlich koinr mehr, worom die Inselbewohnr nemme en Europa drbei sei wöllet. Für’s Jâhr 2030 rechnet d’NASA drmit, dass se außerirdischs Leba entdeckt henn, bloss die Engländr send emmer in dr EU drbei.

A guate Woch ond em Herrgott sein Sega.