Am Schorsch sei Großvatr isch sei Held gwä: Er hât’s Fahrrädle repariera könna, hât Drache baut, hât erklärt, uff was mr beim Hühnrfüttra uffpasse muas, hât oin ens Gmüsgärtle mitgnomma ond hât irrsennige Gschichtla vrzähle könne, au von wahrlich net scheene Zeita. Jetzt isch dr Schorsch selbr Großvatr, ond was passiert grad? Der gegaseitige Respekt ond Wertschätzong zwischa de Generationa ond des Profitiara vonanandr wird von einige – von wem au emmer em Denka ohredlich manipulierte – Jugendliche oifach hegmacht. Dia Alte machet also dia Welt he, liaget bloss no als kostspielige Renter dr arbeitenda Generation uff dr Tasch’ ond machet anscheint’s so dr Jugend dia Zukunft kaputt. Ond was machet dia Alte wirklich? Sie haltet bei älle Vorwürf’ d’Gosch. Weil se genau wissat, wenn se die Lebensleistong ihrer Generation offensiv benenna dätet, würdet se in dr heutiga Social-Media-Fake-News-Welt mit denne agressiva Jugend-Messias dr Kürzere zieha. Schad’, dass dia Jonge nemme zuhorcha wellet, weil se au ohne eigene Lebenserfahrong dia Weißheit mit sprichwörtlich’ große Löffel gfressa hen.

A guate Woch’ ond em Herrgott sein Sega.