Mit Lichthup’, blinka odr Signalhorn – odr gar mit ma Tüchle aus em Seitafenschter – wird entzwische dene Künstler bei Kultur-em-Auto ghuldigt. Für dr Schorsch hât des scho a bissle ebes Erbärmlich’s, zu was mr dia Künstler zurzeit zwengt. Uff jeden Fall hât’ s’Autokino a Auferstehong als Kulturtempl kriagt.

Dr richtige Zeitpunkt für dr Schorsch sich zom Erinnra, weil s’war dr sämstägliche Höhepunkt für Ausfahrte mit’m Moped. Ebaso freudig erregt, wia em Rückblick a weng vrschämt, isch’s ens Autokino ganga, des en Kornwestheim, als ois von de erste em Ländle, eigentlich autofahrende Cineasten haufweis’ âglockt hât. Für dia mopedfahrende Filmfreind hât dia Kornwestheimer Location a ideale, wohl kaum erwünschte, Bsonderheit: An dr Zufahrt entlang, dâ gibt’s an Erdwall, wohl om dene net zahlenden Autofahrer dr Blick ufff d’Leiwand zom Vrwehra. Für jugendliche Biker, dia mr en den Siebzigr-Jâhr not net so ghoißa hat, war dr Erdhubl abr di begehrt’ Location gwä, om etwa bei Easy Rider mit Peter Fonda, Dennis Hopper und Jack Nicholson von ra Tour durch die Weita von Amerika zom träuma. Des Ganze isch durch des Vorhandasei von Halb-Gallonen-Jim-Beam, dia a Mopedfreind durch seine Beziehonga in dr Sachsenheimer PX-Lada bsorgt hât, mehr als bedenklich vrstärkt worda. Dr Filmton isch dâmals noch übr Alu-Guss-Lautsprechr ens Wagainnere übertrage worde. Ond weil dia Kinobsuchr dia Dengr lässig en dia halboffene Seitascheiba gehängt henn, hend auch die Zaungäst’ a bsonders Klangerlebnis kriagt.

A guate Woch’ ond em Herrgott sein Sega.