Ferienzeit isch Reisezeit. Des isch wenigstens bisher so gwä. Jetzt bleibet entwedr drhoim em Garta odr uff Balkon hocka, odr vrbrengat dr Urlaub em besta Fall auf dr Schwäbischa Alb, em Schwarzwald odr vielleicht an dr deutscha Nord- ond Ostseeküste. Was fehlt? Oft des mediterrane Dolce far niente – des süße italienische Nexmacha – ond dia entsprechende Gschmäckla. Dr Schorsch macht deshalb jetzt Urlaub em Supermarkt, ond zwar am Gwürzregal. Ach, wia vrlockends riacht’s dort nach Rosmarin, Salbei, Basilikum, Thymian, Oregano, Minze, Estragon ond Koriander, mr fühlt sich grad am Mittelmeer. Schwierigr wird’s mit dera Vorstellongskraft am Oliva-Regal. Die schwarze ond grüne Böbala guckate oin zwar recht italienisch odr griechisch â, abr aus den Glasgläsle kommt koi mediterrans Düftle aus. Vielleicht sott mr mâl am Gläsle schlecka? Noi, gâht jâ garnet (Stichwort: Âsteckongsgfahr).

Also schwelga mr en Erinneronga, bleibt ons jâ nex anders übrig. Â guate Woch’ ond em Herrgott sein Sega.