Uffgregt wia a klois Kend isch dr Schorsch am heutiga Samstich, weil nâch ma depremierenda Jâhr en dere ondrklassiga Profiliga send die Rote-Brustreng-Kicker wieder em Bundesliga-Oberhaus. Weil’s letztendlich bloss so mit Ach ond Krach mit dem Uffstieg klappt hât, isch jetzt die Uffregong omso größer. Abr em Gegensatz zu dene ohsäglich arrogante Ligaufftakt’ in der Vrgangenheit send dia Rote-Brustreng-Kicker diesmâl recht degamäßig ond gebat gern dia Favoritaroll’ an dr Gegner aus Freiburg em Ufftakt-Brudr-Kampf ab. Genauso muss’s sei. S’send zwar kaum no Schwâbe in der Mannschaft, abr dia Kicker gebat sich wia Schwâbe. Koi große Gosch, also net viel schwätza, sondern fescht schaffe ond sei Leischtong uff dr Platz brenga. Mit viele jonge Kickr, dia au no kicka könnet, dâ kennt’s ebbes werde. Dr Schorsch hât uff jeden Fall scho mâl seit’m Sommer sei VfB-Fähnle em Garta nuffzoga.

A guta Woch’ ond em Herrgott sein Sega.