Gestern isch dr Tag des Buttrbrots gwä. Mr sieht, Marketing isch älles, anders isch’s wohl net zom erklära, dass vor jetzt 21 Jâhr die Centrale Marketing-Gesellschaft der deutschen Agrarwirtschaft (CMA) den Gedenktag ausgruafa hât. Dr Schorsch dät den Tag net brauche, weil er isch jâ a leidaschaftlichr Vesperer ond Buttrbrotesser.

Ruff ond nondr hend’se em Radio am Freidich des Buttrbrot gnudelt. Ond was hât dr Schorsch mit Entsetza vom Landessender höra müssa? Dia Grassdackl hend doch tatsächlich übr DIE Buttr lamentiert. Langsam wird dr Schorsch oifach müd’. Natürlich hoißt des DER Buttr. Mr muss doch bloss sich an dene europäische Hochsprâcha orientiere. Französich: le beure – der Buttr, italienisch: il Burro – der Buttr. Wer sagt’s richtig? Mir Schwâbe machet’s richtig. Wer macht’s falsch? Oifach älle andere. Bleibt zom hoffa, dass des jetzt oi für älle Mâl klar isch.

A guate Woch’ ond em Herrgott sein Sega.