Heidanai, jetzt wird’s abr höchste Eisabâh’. Heut send’s grad âmol no 48 Tag, nâ isch Weihnachta. Dr kalte Schwoiß stâht em Schorsch jetzt uff dr Stirn. Noi s’gâht net om dia Gschenkla für die Lieben. Dia könnt mr zur Not en dem Jâhr au no direkt von dene Großvrsendr direkt zu de Kendr ond Enkl hoim schicka lassa.

Wenn mr sich vorstellt, was mr wega dem Virus no älles mit ons vor hann kâ, nâ kennt’s vielleicht a Weihnachta in trautr Zwoisamkeit werda. Also hoißt’s ab sofort: faschta. Net wega dr Figur, di isch jâ tatsächlich scho seit Jâhrzehnt vrsaut, ond au net om sich komplett zom entschlacka. S’gâht tatsächlich drom, Platz em Ranza für den Weihnachts-Truthahn zom schaffa. Wia soll mr sonst dem Fenfâhalb-Kilo- Fechtagsbrâta am erste Weihnachtstâg Herr werda, wenn mr bloss höchstens zu Viert am Tisch hockt? Bei älle mögliche Einschränkonga, dr Truthahn am Fescht, der isch sicherlich net vrhandelbar.

A guate Woch’ ond em Herrgott sein Sega.