Morga isch dr erschte Advent. Gott sei Dank, möcht’ mr saga. Weil jetzt sott jâ di Zeit des Mitanandr âfanga. Des isch grad em ohsäglicha Jâhr 2020 zemlich wichtig. Mr hât nähmlich seit a paar Wocha dr Eidruck, übräll herrscht so latente Ohzfriedaheit, di sich en ra permanta Aggresivität zeigt. Wer kennt’s net: Beim Eikaufe rennat d’Leut’ stier durch die Gäng’, lasset ihre Wägela mittladrenn standa ond raunzat andere â, wenn se net schnell gnuag vor dem Gmüasregal sich entscheida könnet. Grad ohvrschämt wird’s, wenn mr am Morga vor am Bäckerlädle staht ond en dr Kälte wartet, weil scho drei Leut’ an dr Ladetheke bedient werdet, ond na so a ohkobeltr Kantschädl mit ma Kopfschüttla ond goschelnd an oim vorbei en dr Lade stapft.

Also lasset mr uff ons dr adventliche Lichtrglanz ond dia große Vorfreud’ in den nächste Wocha wirka, ond werdat mr nett zu de andre.

A guate Woch’, a selige Adventszeit ond em Herrgott sein Sega