Nr. 258 Dr Schorsch vrzählt vom 12. Dezember 2020

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Ach herrjemine, jetzt wird’s abr zehmlich phäb. Bloß no zwölf Tag’ bis zom Heiliga Âbend. S’isch klar, mr hät’s wirklich scho a bissle frühr merka kenna, weil überäll strahlet d’Lichtla, d’Kerza brennat in fascht älle Zemmr, Engl standet rom ond s’duftet au gelegentlich nach Weihnachtsbrötle. Abr dia Gschenkle, dia muas dr Schorsch tatsächlich no bsorga. Bloss, wenn se ons en de nächste anderthalb Wocha wiedr dia Lädle zuaschliaßet, nâ wird schwer, mit de warme Socka, an dicka Pulovr, an kuschliga Schal, a flauschige Wentrjack’ ond natürlich, ganz wichtig, Handschuah zum Christfest. Worom des älles? Weil en dem Jahr fendet dr Gottesdienst am Heiliga Âbend em Freia statt, da brauchst meh, wia wärmende Wort. Brrr.

A guate Woch’ ond em Herrgott sein Sega.