Zom erschta Mâl en seim Leba isch dr Schorsch sprachlos, weil diesmâl muass’r am Heiliga Âbend drhoim hocka. Ach wia hâtr’s sich no am Montag gfreit, wia’r sich für dr Heilig-Âbend-Gottesdienst uff em Schlosshof âgmeldet hât, ond au glei dui Bestädigong kriagt hât, dass’r dabei sei därf. Jetzt isch am Donnerstich dia Bestätigong wiedr zrückgnomma worda, weil der Kirchagemeindrat en ra außrordentlicha Sitzong beschlossa hât, dia Gottesdienst an Weihnachta abzomsaga. Mr häb sich di Entscheidung net leicht gmacht, so hoißt’s, abr mr wöllt die rechtliche Vrodnonga net voll ausschöpfa, sondern mr dät „unsere Verantwortung für die zu erwartenden Besucher unserer Gottesdienste sehen müssen“. Mr könnt ja dr Heilig-Abend-Gottesdienst em „Livestream“ uff em Computr âglotza. Für manche Alte, für dia, wer woiß des vielleicht s’letztsche Weihnachta sei kâ, isch des bestemmt a Trost. Vielleicht kriagat se jâ jetzt so a Computerle von ihre Liabste ondr dr Christbaum glegt ond jemand duat’s bediena. Für dr Schorsch wird’s koi seligr Weihnachtsâbend, ond er stellt dia Frag’, welches Menschabild henn se, dass se Leut’ vor sich selbr schütza wellet, ond letztendlich fragt sich dr Schorsch wo isch eigentlich – grad an Weihnachta, wo mr d’Geburt vom onserm Heiland feirat – des sprichwörtliche Gottvertraua blieba.

A hoffentlich gute Woch’ ond em Herrgott sein Sega.