Nr. 265 Dr Schorsch vrzählt vom 20. Februar 2021

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Vrordnonga, dia kennat mr jâ zur Genüge en dene Zeita. S’wird ons gsagt was mr dürfat, odr besser was mr net dürfat. Abr jetzt gibt’s oine, di gfällt sogar em Schorsch. So dürfat en Oberammergau dia Männr ihre Bärt’ nemme wegrasiera. Dr Grond? Em nächste Jâhr sollet jetzt endlich dia zwoi Mâl vrschobene Passionsspiele stattfinda, ond dâ drzua brauchet se an Haufa Männr mit lange Rauschebärt. Vielleicht sott dr Schorsch jetzt dort nâ ens Bayrische ziage, weil dr Bart für an Christusdarstellr hât jâ scho seit viele Jâhr, ond er hät somit em vorauseilanda Gehorsam scho älles richtig gmacht.

A guate Woch’ ond em Herrgott sein Sega.