Basset uff, am Mondich wird’s wiedr dramatisch. Noi, dr Schorsch hât, Gott sei Dank, koine epidemiologische Vorhersehonga. Am Mondich übrnemmat dia Eisheilige wiedr s’Kommando, grad, wenn mir sich an dene viele, scheene seelaschmeichelnde Blüta erfeua will. Recht wichtig en dene Zeita. Dr erschte von dene gestrengen Herren, dr Mamertus (Bischof von Vienne), soll am 11. Mai an Temperatursturz von mendestens zehn Grad em Gepäck hann, wenn mr dene Wettrvoraussaga glauba kâ. Wobei, ond des kâ sich dr Schorsch au heut’ net verkneifa, wia mr fascht älle Tag seha kâ, isch des mit de Prognosa so a Sach’. Sicher isch abr, vom 12. bis 14. Mai bsuchat ons nâ Pankratius, Servatius ond Bonifatius. Wenn nâ die kalt’ Sophie – a frühchristliche Märtyrin ond Muttr von drei gweihte Jongfraua – am nächschta Donnerstag kommt, nâ isch’s hoffentlich rom mit dene fröschtelnda Tag.

Recht bemerkenswert isch en dem Jâhr, dass dia Eisheilige so pünktlich, wia scho lange nemma, kommat. Weil, dia alte Bauraregla beziegat sich uff dr Julianische Kalendr, ond so henn sich eigentlich dia Data seit dr Gregorianische Kalendrreform em Jâhr 1582 zemlich nâch henta vrschoba – eigentlich so om dr 20. Mai rom. Was letztendlich scho onsre Vorfahra aus Erfahrong gwisst henn, des könnat heutzutag dia Wetterkundlr meterologisch erklära: Ab Âfang Mai erwärmt sich nämlich dr europäische Kontinent zemlich. Des Meer abr, wird langsamr wärmer ond so gibt’s an Tiefdruck, dr eiskalte Luft vom Polargebiet zu ond druckt.

Trotzdem a guate Woch’ ond em Herrgot sein Sega

En dr aktuella „Käfighaltung“ send mir jâ zur kompletta Entschleunigong vrdammt. Irgendwia au schee. Bloss manchmâl wird mr nâ scho au uff a ganz extrema Prob‘ gstellt. Dass mr beim Bäckr mit dem gehöriga Abstand von a bissle mehr wia oin Meter ond fuffzig Zentimeter wartet, ond dâbei gelegentlich bis weit uff Strâß‘ naus stâht, des ghört jetzt zur Normalität. Mr nemmt sich also Zeit, wenn mr sich a paar Brezla als vormittäglicha Lebenshöheponkt gönna will. Mit dr Entschleunigong wird‘s nâ abr scho recht schwierig, wenn mr nâ endlich en zwoitr Reih‘ em Lädle (emmerno konsequent mit a bissle mehr wia oin Meter ond fuffzig Zentimeter) wartet, dass mr sei Begehr an Backwara uffgeba därf. Mit größtem Interesse an dr Beschaffenheit von dene ondrschiedliche Weckla ond anderem Backwerk em omfängliche Âgebot, fraget jetzt dia zwoi Kunda, dia no vor oim send, bei dene bedauernswerte Verkäuferinna nâch.

Di Entdscheidong isch schwer: Soll mr jetzt a Laugaweckle nemma odr doch liabr a Laugastengle odr etwa am Besta doch dia Brezla? Ond wia sieht‘s mit dene Kürbiskern-Brötla aus, odr doch liabr a Mehrkorn-Weckle beziehungsweis‘ gar a Rogga- odr Dinkel-Vollkorn-Brötle?

Mr merkt, mr macht sich dia Entscheidong net leicht, so gega 9 Uhr. Des älles will wohl übrlegt sei. Am Schorsch sei Hochachtong für den Langmut von dene Verkäuferina steigt von Minute zu Minut‘ ens Ohermessliche. Am Schorsch sei Entschleunigong gâht in dera Zeit zunehmens (ond expotenziell, des isch jâ zurzeit so a viel vrwendeets Wort) dr Bach na. „Herr schenk mir Geduld – abr schnell“, so sei ennerlichs Stoßgebet nâch oba. Braucht‘s jetzt wirklich dia zwoi Brezla, odr dät‘s net au no dr Brotriebl von geschtern?

 gute Woch‘ bleibat gsond (ond entschleunigt) ond em Herrgott sein Sega.