Es isch Sommer gwä, ond en dera Zeit wird so manche Sau durch dr Blätterwald triebe. So hât Cem Özdemir, Grünr Landwirtschaftsminischter aus Württemberg mit schwäbische Wurzla, di Idee ghet, Werbong zom vrbiata für Lebensmittl mit viel Zucker, Fett ond Salz. Möglicherweis’ ghörat au dia schwäbische Laugabrezla drzua, wia a CDU-Abgeordnete aus’m Rems-Murr-Kreis messerscharf kombiniert hât, ond prognostiziert dr Brezelondrgang. Drbei häb’ dr Özdemir no em letzschta Jâhr drfür gworba, dass onsre Brezla zom UNESCO-Weltkulturerbe werda sottet. Sommerloch-Händeleia, so schätzt dr Schorsch des Gezetre ein, ond er hälts liebr mit dem legendäre Stuttgartr Oberbürgermeister Manfred Rommel: „Des Schwaben Klugheit ist kein Rätsel. Die Lösung heißt: Die Laugenbrezel! Schon trocken gibt dem Hirn sie Kraft. Mit Butter wirkt sie fabelhaft. Erleuchtet mit der Weisheit Fackel, den Verstand vom größten Dackel.“

 guate Woch’ ond em Herrgott sein Sega.

Ab dr Jahrtausendwende isch’s Allgäu für 15 Jâhr die zwoite Hoimat für dr Schorsch gwä. Jetzt hât’sn nâch acht Jâhr wiedr mâ für a paar Tag dort nâh trieba. Ond was soll mr saga? Es hât sich fast nex vrändert. Dia Alpa sind emmer no hoch, Schloss Neuschwanstein emmer noch schee ond von ohsennig viele Japâner bevölkert, Füssen hât nei- und nauszuas seine Staus – ond dr Forggasee isch emmer no saukalt.

Allerdengs, wo vor acht Jâhr noch Luftmatraza und Badebötla romdümpelt sind, gibt’s jetzt ohzählige Stand-up-Paddler – odr sott mr liabr saga, sotte, wo sich vrsuchat uff dem Brettle per mehr oder wenigr elegante Bewegong, mittels vom a langa Paddel zom halte. Stondalang hät dr Schorsch am Seeufer hocka könne, om denen meist mittelalterliche männliche Sportler bei ihre Aktivitäten zua zom gucka. Ganz großes Kino, dâ brauch’sch koi Komede, dia kriagsch ganz omsonst uff’m See.

 guate Woch’ ond em Herrgott sein Sega.

Ach herrjemine, soll dr Schorsch heut’ übr dr Fußball schreiba? Worom au. Dia Bundes-Fußballkickr send grottaschlecht, des woiß mr scho seit Langem. Ond jetzt machets dia Bundes-Fußballkickerinna de Kerle nâch. Vielleicht sottet se beim Kicka ihre Skistiefel gega Kickschuah omtauscha, nâ könnt’s vielleicht irgendwann ebbes werda. Sei’s drom. Au dr Herzensveroi vom Schorsch (der mit dem rota Bruschtreng) bekleckert sich grad net mit Ruhm. Vor Wocha no, dâ hât mr großspurig a Partnrschaft mit dene boide Autokonzern aus Stuagart gefeirt ond drbei dr Zammhalt en Württemberg lauthals nausgschria. Ond jetzt. Künftig werda sich dia Buaba mit ma französischa Wettâbietr-Logo uff am rota Bruschtring präsentiera. Des vrschtâht, wer will. S’gâht halt om Milliönchen. Dr Schorsch übrlegt, ob’r jetzt net meh Faustball âgucka sott. Dia send nämlich jetzt zom 13. Mâl Weltmeister worda – ond des mit Buaba von hier.

 guate Woch’ ond em Herrgott sein Sega.

Di „allerletztsche Generation“ hât sich drfür entschieda, durch Festbeppa uff dr Strâß’ di Welt zom retta. Sollet se, abr vielleicht könnt’ di Jugendzeit vom Schorsch, sia uff an andra Weg bringa? Dr Schorch g’hört zur Generation, wo no alloi en d’Schul dappt isch ond di ihre Hausuffgâbe no ganz alloi gmacht hat, weil mr ganz schnell uff Gass’ zom Spiela wölla hât. Schließlich henn mir die ganz Zeit uff dr Gass vrbracht, ond send hoim, wenn’s donkl worda isch. Mir send uff hohe Bäum’ nuffkraxelt, henn Papierfliegr baut, mit Schneller (Murmla) gspielt ond als Mutprob’ au âmol an Regewurm nondrgschluckt. Mr isch froh gwäh, wenn am Fahrrädle wenigsten oi Brems doa hât, weil ohne Helm hätt’ mir sich ganz âständig dr Grend nâschlage könna. Mindestens oimal hât mr en de Sommerferia zum Doktor müssa, weil mr âmol wiedr blutet hât, wia a klois Säule. Mir henn onser Jugend gnossa, s’Leba glebt – ond übrlebt.

 guate Woch’ ond em Herrgott sein Sega.

Was für a Freid’. Jetzt hât dr Schorsch a ganz liab’s, en Handschrift gschieba’s Briefle aus Spielberg kriagt – „dem Herzen der Stadt Sachsheim“, wia die 84-jährige Doris schreibt. Sie sei a übrzeugte Schwäbin, gebora en Cannstatt. „Jeden Samstag freu ich mich auf dein Gschichtle in der Zeitung, vor allem natürlich auf des Schwäbische. Manchmal find ich Wörter, die ich schon ewig nicht mehr gehört habe und freue mich, dass das Schwäbische noch lebt“, schreibt se. So viel Lob aus berufnem Mund, des macht dr Schorsch ganz vrlega. Di Doris hat nämlich zwoi eigene schwäbische Gschichta beilegt, dia se vor rund vier Jahrzehnt verfasst hât ond ondr andrem bei Seniorafeiera vortraga hât. Ob dia Gschichta wohl am Schorsch gfälla dätet, hât se gfrâgt. Natürlich hat’m „D’Maus“ ond „D’Suse on de lange Strempf“ ganz arg gfalla. S’dät no meh’ geba hât Doris gschrieba. Her drmit liebe schwäbische Schwester. Â guate Woch’ ond em Herrgott sein Sega.

Vrsprocha isch vrsprocha – dr Schorsch isch drbei gwä. Meh’ wia drei Dutzend Mundartfreund’, -funktionär ond -aktivista hend sich am Mittwoch im siadighoißa Stuttgartr Kessel em Hospitalhof troffa. Sia henn g’kreist ond was isch rauskomma? Dr DDDBW, ohne irgendoin Bindestrich (net zwischa DDD ond BW, au net zwischa B ond W), was abr durchaus während dem zwei Stond’ und 23 Minute langa Geburtsvorgangs ein ausschweifend diskutierbars Thema gwä isch. So hoißt also dr neue Dachverband der Dialekte Baden-Württemberg DDDBW. Doch dia Abkürzong isch net des Oinzige gwä, was mit viel Enthusiasmus ond Anregongsvielfalt besprocha worda isch. Fast zwoi Stond isch Satz om Satz der 15 Paragrapha langa Satzong beäugt worda, uff Richtigkeit, uff Auswirkonga, uff Bestand ond dr Notwendigkeit älle Dialekt- ond Mundartwächter em Ländle gerecht zom werda. Eigentlich koi Wondr, schließlich gâht’s au om 78 000 Euro, dia von vier Landtagsabgeordnete mit Markus Rösler an dr Spitze em Land aus em Kreuz gleiert worda sind, dmit der neue DDDBW Initiative finanziera kâ, om di Mundart im Ländle zom Fördra. Apropro neu. Dr oinzig „Neue“ isch em Dachverband dessa am Mittwoch von dr Gründongsversammlung gwählte Vorsitzende: Dr. Martin Kistler, Landrat vom Landkreis Waldshut en dr südlichsta Eck’ an dr Grenz’ zur Schweiz.

Älle andre em Vorstand send Dialektfreund’, -funktionär ond -aktivista, dia sich scho lang in dr Mundartszene tummlat. Wartet mr also gspannt ab, was dr DDDBW Neues uff dr Weg brengt.

 guate Woch’ ond em Herrgott sein Sega.

Ganz übrrascht worda isch dr Schorsch jetzt von ra treua Leserin. Weil sie so viel Freud’ an seine schwäbische Kolumna hât, hat se ehm â klois gelbs Magnetle gschenkt ond dâ stâht druff: „Schwäbisch isch seggsie.“

Ach wia herrlich, ond natürlich isch dr Dialekt seggsie. So isch’s jetzt au endlich an dr Zeit, dass em Ländle a Landesverband für Dialekte en Baden-Württemberg gründet wird. Nächsta Mittwoch isch so weit, em Salon des Hospitalhofs Stuttgart en Stuttgart wird zerscht übr dr Satzongsentwurf, der en dr letzschte Wocha vrfasst worda isch, befonda ond nâ kâ dr Vrband gründet werda mit ällem drom ond drâ. Â Vorstand wird gwählt ond au â Beirat mit dem Ziel de Dialekt im Ländle â mächtige gemeinsame Stimm’ zom geba. Natürlich wird dr Schorsch, weil’r ja bekanntlich recht wonderfitzig isch, bei dera Vrsammlung drbei sei, ond sicherlich am nächsta Samstag an dera Stell’ sein Senf drzua geba.

 guate Woch’ ond em Herrgott sein Sega.

Heidanei, jetzt wird’s eng für dr Schorsch. Wird’s dr Schorsch au weitr geba? Blödrweis – ond aus übrmäßigr Wondrfitzigkeit – hât sich dr Schorsch bei „ChatGPT“ âgmeldet, dera Internetplattform, wo mr ällerlei Frâge stella kâ ond aus dene di „künstlich’ Intelligenz“ sogar Gedicht’, Witzle, „literarische“ Text verfassa duat. Also was macht dr Schorsch in ra Phas’ von geistigr Omnachtong? Er fragt des „ChatGPT’le“, ob’s denn auch schwäbisch schwätza kennt. Was nâ komma isch, hat’n schier ausm Sessel gschlaga: „Ja, i kann schwäbisch reda. Wia kann i dir helfa?“ Jessasnoi. Jetzt muss es schwer werda, am Beschta mit’m Schorsch seim Lieblingswort. Weißt Du was ein Fazinettle ist? Di Antwort isch promt komma: „Ja, i weiß, was a Fazinettle isch. A Fazinettle isch a schwäbischer Begriff für a kleins Handtüchle oder a Stofftaschentüchle. Es isch meischdens eckig und wird oft zum Abwische vo de Händ oder zum Putza benutzt. Manche Leit nehmets au als a Art Schweißband oder zum Drockawische, wenn ma was verschüttet hat. Fazinettle sind in dr schwäbischen Kultur recht beliebt und werdet oft als praktisches Accessoire mit sich rumgtraga.“ Am Schorsch isch ganz schwummrig worda. Mr muss dem Apparat doch seine Grenza zeiga. Wer war der erste Schwabe? „Es isch schwierig, genau z’sage, wer dr allererschde Schwabe war, da Schwaben scho seit Jahrhunderte als Ethnie und Kulturgemeinschaft existierat. Dr Name „Schwaben“ geht uf dr Stamm der Sueben zruck, dia in dr Antike in dere Gegend ansässig warat. Historisch gseha gab’s aber koine bestimmten Einzelpersone, wu als dr allererschde Schwabe gelte könnt. Schwaben isch eher a regionale Bezeichnung für die Bewohner vo dr Region Schwaben im südwestliche Deutschland. Es handelt sich um a weitverbreitete Bevölkerungsgruppe mit gemeinsamer Dialekt, Kultur und G’schicht.

Es gibt jedoch bedeutende Persönlichkeiten aus Schwaben, die in dr Geschichte bekannt und einflussreich wara, wie zum Beispiel Johannes Kepler, Gottlieb Daimler oder Wilhelm Hauff. Aber dr Begriff „erster Schwabe“ wird in dere Hinsicht eher metaphorisch verwendet.“

Jetzt hoißt’s abr âstrenga, net dass dr Apparat der Schorsch übrflüssig macht.

 guate Woch’ ond em Herrgott sein Sega.