Übr dia Phase von seim Leba will dr Schorsch filosofiera. Als jonger Kerle hât’r wia faschd älle – en dera Zeit von Sex ond Rock ond andre Sächla – dia Welt vrbessra welle, ond isch drbei jämmerlich gscheitert. Als jongr Familiavatr hât’r probiert seine Kendr dia Welt zom erklära, om se hoffentlich uff dr richtige Weg zom schicka. Fascht vrzweifelt isch dr Schorsch später, an de Leut’, dia damals (wia heut’) dr gsonde Menschavrschtand verlora henn. Lang isch di Zeit gwä, in dera es am Schorsch am liabschta gwese isch, wenn s’ehn oifach en Ruah’ glassa henn. Jetzt hofft’r uff dia Altersmilde ond vor ällem uff dia zua erwartende Reife em Leba. Ond er isch drbei ganz arg an sich zom schaffa. Net, dass aus ehm au no oinr von der furchtbarer Grandler wird, dia sich sogar übr dia Muck’ anr Wand uffregat.

A guate Woch ond em Herrgott sein Sega