Dr Schorsch vrzählt vom 10. Februar 2018

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Jetzt wird’s langsam herb mit dem Fasching. Am Schorsch sei Mage gibt langsam dr Geischt uff. Seit Dienstag haut’r sich jetzt jeden Tag vom ma andera Bäckr mit Gsälz gefüllte Fasnetsküchla nei, bloss om feschtzomstella, wer dia Beschte hât. Bis Dienstag will’r des no durchhalte, ond tapfer Schmalzbackene begutachte ond prüfend kaua. Wobei er jetzt scho woiß vom wem die allerbeschte send: Natürlich dia von seinra Frau. Gott sei Dank fangt am Mittwoch dia Faschtazeit â.

A guate Woch’ ond em Herrgott sein Sega