Altweibrsommr henn mr, ond zwar oin, wia gmâlt. Was für a schöne Zeit: Trauba, mit ma Gschmack, wo oim s’Wassr en freudigr Erwartong uff an prächtiga Wei’ en dr Gosch dzammalaufa lässt, Blättr an de Bäum’, wo sich farbafroh vrfärbet, a milde Sonn’, wo oim so recht s’Herzle wärmt, ond ebe au Kürbis (siehe „Schorsch“ vom 26. Septembr). Eigentlich isch älles prima. Abr bloß, wenn mr mit zuadruckte Auga durch d’Suprmärkt gâht. Weil dort vergrätzet se oim, scho glei nâch de Sommerferia, die Vorfreud’ uff d’Adventszeit, uff dia mir sich normal erscht am End’ vom Novembr freut. Wia en jedm Jâhr könnet’s dia Vrkäufr net vrwarta, oim Lebkucha ond Dominostoi âzombieta, dia wo mr frühr erscht em Dezembr en sich neigschaufelt hât. Natürlich hât mr sich dâdra seit etliche Jâhr gwöhnt. 2015 möcht’ mr abr vom Glauba abfalle, em wortwörtlicha Senn. Weil, wenn mr Lebkucha ond Dominostoi net mâg, nâ greift mr em Râhme vom Konsumzwang halt gern zom ma Niklas aus Schoklad’. Bloß was macht oinr von dene Discountr? Dia henn en ihre Auslage koine Schoklad’-Nikläus meh’, sondern „Zipfelmännchen“. A Facebook-Freundin hât gschrieba, dene Glufamichl häbet se vor lautr „politischer Korrektheit“ oifach s’Hirn klaut. Des glaub i au.

I wünsch’ Euch a guate Woch’ ond ganz bsonders am Herrgott sein Sega