Bekanntlich mâg dr Schorsch koine Vegetarier. Dr Grond isch ganz oifach ond schtâht scho en dr Bibl: Di Eva ond dr Adam müsset nämlich Vegetarier gwäsa sei, weil se jâ en dr Äpfl dr Erkenntnis oherlaubtrweis’ neibissa henn. Hätt’ nämlich di Eva ihrn Adam stattdessa en a Brâtwurscht neibeißa lasse – nâ dätet mir älle no em Paradies lebe. Soweit di Übrlegonga zom Sündafall. Apropos Sündafall: Jetzt gibt’s doch tatsächlich sogar vegane Kondome. Di Dengr send sogar zertifiziert ond geltet deshalb als sichr. Bloss jetzt stellt sich scho a Frâg, wer braucht scho vegane Kondome? Bei ureigenschta Eisatz isch doch eigentlich völlig egal, so sott mr moina. Ond wer, des wär jetzt di zwoit Frâg, will eigentlich solche Dengr veschpra? Weil bloss dann, dät jâ für Fleischvrachter des nâ an Senn mache. Odr? Abr solang mr ons übr so an Blödsenn Gedanke mache könnet, gâht’s ons jâ eigentlich no recht guat. Odr isch des scho a Zeicha drfür, das mir – wia seligsmâl des römische Reich – langsam dr Bach na ganget.

A guate Woch’ ond em Herrgott sein Sega