Dr Schorsch vrzählt vom 14. Oktober 2017

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Fraua send bekanntlich für ons Männr die gröschte Mysteria. Ond dia viele Frâge, dia sich om den „schöne Geschlecht“ rankat, henn sich in de letzschte Tâg nomâl vrvielfacht, wia dr Schorsch an scheene Mittag em ma Straßacafé vrweilt hât. Älle Fraua, egal ob zwölfjährigr Teenager oder 85 Jâhr alte Oma, henn ois gemeinsam: Älle henn a Handtasch’ drbei: Große, fascht wie Eikaufstasche, kloine, en dia fascht nex neibasst, en älle Farbe, mit Stickereia, Pailetta odr Fransa, mit oim, zwoi oder gar koim Henkl, mit Trageriehma, welche aus Leder, Plastik odr Stoff. Bloss worom Fraua Handtasche brauchet, sobald aus kloine Mädle jonga Dengr werdet, des koi oim niemand erklära.

Mir Männr brauchet koine Handtasche – höchstens amol a Plastikguck, wenn mr em Baumarkt gwesa send. Au dia ohseelige Zeita mit denen kloine „Buko“-Täschla am Handglenk am End’ der 1970er-Jâhr henn sich Gott sei Dank au net durchsetza könna.

A gute Woch’ ond em Herrgott sein Sega