Manche graust’s oifach vor gar nix. Es isch jâ gelegentlich so, dass manche aus Sch***e Geld machet, dass jetzt abr dâ drmit au Politik gmacht wird, des isch mr neu. Was isch passiert? A paar Vrrückte henn doch scheint’s einige Bäum uff em Gelände vom neua Stuttgarter Bâhhof mit dem Sch**ß’ von dene Juchtakäfr vrschmiert.
Weil mir jâ entzwischa en ra vrückta Welt lebat, henn dia gmoint, des könnt den Bau von dem Bâhhöfle nomal a bissle vrzögra. Weil der krabbelnde Liebling äller Bâhhof ’s Gegner isch ja bekanntlich so bsonders, so herzig, so goldig ond vor ällem so selta, dass mr’n schütza muss. Blöd isch jetzt bloss, dia Spezialischta
bei der Bâhhofs-Bauer henn gar koin Juchtakäfr an denen Bäum gefonda, sondern – oh Wonder – bloß seine Henderlassaschafte. Dr Schorsch kâ bloß drzua sage: Was für’n Scheiß.
A guate Woch’ ond em Herrgott sein Sega